Exodus 29

Hahelaḡa Taudia Ihahelaḡadia

1Ini ba hahelaḡadia toma, bena egu hahelaḡa taudia ai baela. Boromakau natuna maruanena ta bona mamoe mamaruanedia rua, asi bebeka-bebekadia, bavabidia. 2Flaoa asie hatubua e gabua, bona flaoa asie hatubua atagadia dehoro ida e bulo, bona flaoa asie hatubua atagadia latadia dehoro e seia ḡaudia danu bavabi. Ini na uit flaoana amo ba kara. 3Bosea ai ba uda, ba laohai; boromakau natuna maruanena bona mamoe mamaruanedia ruaosi ida. 4Bena Aaron mai natuna ida ba hakaudia lao, hebou kalagana iduarana badibadinai ranu amo ba hadigudia. 5Bena dabua bavabi, muri hahedokina bona hahedoki haleḡana bona hahedoki badana bona vaina, iboudiai na Aaron ba hadokilaia; bona gaba ḡauna danu ba ḡeḡelaia. 6Kwara dabuna danu kwarana ai ba ḡeḡea; bona korona helaḡana na kwara dabuana latanai bavatoa kau. 7Bena ihorona dehorona bavabia, ia kwarana ai ba seia, ba horoa. 8Natuna danu ba hakaudia mai, bena edia ba hadokilaidia, 9bona edia gaba ḡaudia ba ḡeḡelaidia, bona edia kwara dabuadia kwaradia ai ba ḡeḡe. Edia hahelaḡa dagina na lauegu ai bae abia, baine mia hanaihanai taravatuna dainai. Aaron mai natuna ida unu ba hahelaḡadia toma.

10Bena boromakau maruanena ba hakaua lao, hebou kalagana vairanai. Aaron mai natuna ida imadia na ia kwarana ai bae atodia kau; 11bena boromakau na Iehova vairanai bavalaia, hebou kalagana iduarana badibadinai. ? 12Bena boromakau rarana kuri ta bavabia, ihaboulaina patana doadia na imamu kwakikwakina amo ba dahulai; a rara orena na pata badinai ba bubua. 13Bena bogarau urubina bona ase digarana bona nadinadi mai digaradia ida bavabi, ihaboulaina patana latanai ba gabudia, bena bae ḡoledia oho. 14A boromakau hidiona bona kopina bona taḡena na taruha murimurinai ba gabudia, bae ḡoledia oho. Ina na kara dika iabi-ohona boubouna.

15Una murinai mamoe maruanena ta bavabia, Aaron mai natuna ida imadia na ia kwarana ai bae atodia kau. 16Bena mamoe na bavalaia, rarana bavabia, ihaboulaina patana ohena kahana kahana ba nevaridia heḡeḡe. 17Bena mamoe ba ivaia, bogarauna bona imana bona aena ba huridia, hidiona bona kwarana ida ba haboudia; 18idoinai na ihaboulaina patana latanai ba gabudia. Ina na ḡole-oho boubouna, Iehova ena; ia na bonana namo ḡauna, lahi boubouna, Iehova ena.

19Mamoe maruanena iharuana bavabia, Aaron mai natuna ida imadia na ia kwarana ai bae atodia kau. 20Bena mamoe na bavalaia, rarana kuri ta bavabia, Aaron taiana idibana abona natuna taiadia idibadia abodia ba dahulaidia, imadia idibadia bona aedia idibadia sinabadadia danu ba dahulaidia. Bena rara orena na ihaboulaina patana ohena kahana kahana ba nevaridia heḡeḡe. 21Bena ihaboulaina patana latanai e miamu rarana bona ihorona dehorona bavabi, Aaron mai dabuana ida bona natuna mai dabuadia ida ba nevarilaidia. Ia mai dabuana ida bae helaḡa; natuna danu mai dabuadia ida bae helaḡa.

22Mamoe maruanena digarana bavabia, bona iuna digarana, bona bogarauna urubina, bona ase digarana, bona nadinadi mai digaradia ida, bona idiba mamuna; badina be ina na hahelaḡa mamoena. 23Flaoa igabuna ta, bona flaoa dehoro amo e kuia atagana ta, bona ataga kavakava ta, asie hatubua flaoana boseana amo ba vai, Iehova vairanai. 24Bena Aaron imana ai bona natuna imadia ai bavato, bae davedavelai, davedave boubouna ai baela Iehova vairanai. 25Bena imadia amo bavabi lou, ihaboulaina patana latanai ba gabu, hari ḡole-oho vamuna ida. Ia na bonana namo ḡauna Iehova vairanai; ḡole-oho boubouna, Iehova ena.

26Aaron ihahelaḡana mamoena kemena bavabia, ba davedavelaia, dave-dave boubouna ai bainela Iehova vairanai; bena bavabia, oi ahumu. 27Hari keme, e davedavelaia ḡauna, bona mamu, e duduia isi ḡauna, ba hahelaḡadia; badina be ia na Aaron mai natuna ida ihahelaḡadia mamoena. 28Idia ahudia bunu, Israel taudia ese bae henidia hanaihanai. Badina be hahelaḡa taudia ahudia bunu, Israel taudia ese edia herohemaino bouboudia amo bae henidia; edia boubou ḡauna bae duduia isi, Iehova ena.

29Aaron ena dabua halaḡadia na natuna ese bae abi, ia murinai; ihahelaḡadia negadia ai bae doki. 30Ia natuna, hahelaḡa dagina ai baine boloa tauna, ese dina hitu lalodiai baine doki, hebou kalagana ai baine raka vareai, gabu helaḡana ai ḡaukara helaḡadia baine kara negadia ai.

31Ihahelaḡadia mamoena hidiona bavabia, gabu helaḡana ai ba nadua. 32Bena Aaron mai natuna ida bae ania, bona bosea lalonai e miamu flaoana danu bae ania, hebou kalagana iduarana badibadinai. 33Hari kara dika itahunidia bona edia dagi ihahelaḡadia ḡaudia na idia ese bae ani; a taunimanima kavakavadia na basie ani, badina be unu ḡau be hehelaḡa. 34Hari ihahelaḡadia vamuna eiava flaoana bahudia bema mia rani, idia na lahi ai bema gabu bena bema ḡole oho; basiema ani, badina be hehelaḡa.

35Ini kara iboudiai na Aaron mai natuna ida ba kara henidia, egu hahedua heḡereḡerena; dina hitu lalodiai ihahelaḡadia karadia bae hesiriu. 36Dina ta ta ai boubou boromakauna ta bavalaia, kara dika itahunina ḡauna; kara dika iabi-ohona boubouna ta danu ba karaia, ihaboulaina patana ena; ba horoa bona ba hahelaḡaia. 37Dina hitu lalodiai boubou ba kara, ihaboulaina patana ena; unu amo ba hahelaḡaia ela bona baine helaḡa vaitani, bona enai bae dau kau ḡaudia danu bae helaḡa.

38Boubou ḡaudia ihaboulaina patana ai ba gabu, bena bae ḡole oho, ḡaudia bini: mamoe natudia rua, laḡani ta do asie haḡuḡurua ḡaudia, dina ta ta amo ba gabu; 39ta be daba ai ba gabua, ma ta adorahi ai. 40Flaoa namona nau auta dehoro namona kehere ta amo ba kuia, mamoe natuna ida bavato kau; bona vine ranuna kehere ta ihaboulaina patana latanai ba seia. 41Mamoe natuna iharuana na adorahi ai ba gabua, bona ia ida flaoa boubouna bona inuinu danu ba heni. Ina na bonana namo ḡauna, ḡole-oho boubouna, Iehova ena. 42Ina ḡole-oho boubouna ba kara loulou, uru iboudiai; hebou kalagana iduarana badibadinai bae kara, Iehova vairanai. Unuseni ai lau baina hahedinarai henimui, bona oi baina hereva henimu. 43Unuseni ai lau ese Israel taudia baina hahedinarai henidia, bona lau hairaiagu ese kalaga baine hahelaḡaia. 44Lau ese hebou kalagana bona ihaboulaina patana baina hahelaḡadia; Aaron mai natuna ida danu baina hahelaḡadia, egu hahelaḡa taudia ai baela. 45Lau na Israel taudia bogaragidiai baina noho, edia Dirava. 46Idia bae diba lau be Iehova edia Dirava; Aigupto amo na hakaudia lasi, bogaragidiai baina noho helaoreana. Lau binai Iehova, edia Dirava.